Aankondiging

Sluiten
No announcement yet.

De Resepte

Sluiten
X
 
  • Filter
  • Tijd
  • Tonen
Clear All
nieuwe berichten

  • De Resepte

    Kaw Sjotel.

    Veur hun kaw sjotele ginge de tantes oet vaan eerappeleslaoj, sjoen opgehuip in `t midde vaan `nen ovaalvormige groete platten teleur.
    Op en roontelum dee kleine berg ranzjeerde zij de garnituur, die, al nao gelang de ingrediënte, de lekkernij ederskier anders deeg oetzien. En smake.
    De opsering woord sterk bepaold door de verbeeldingskrach vaan d'n daag.


    Kaw sjotel.
    Recep veur 4 maan:
    (veur d'n eerappeleslaoj)
    1 kilo eerappele
    1 flinken appel
    1 un, hiel fien gesnipperd
    get cetroensap
    get zaajt
    get peper
    `ne sjeut mèlk

    (veur de garnering)
    4 komkömmerkes
    4 hel gekookde eier
    20 zèlver-unnekes
    2 tematte
    4 lepkes gekookde sjink
    8 klein asperges
    get mayenais
    e paar toefkes pittersee je.

    Kook de eerappele in de sjèl, pèl ze en snij ze in dobbelstein vaan 1 tot 2 centimeter.
    Sjèl d'n appel, snij `m in dobbelsteinsjes vaan 1/2 centimeter en sprinkel cetroensap d'reuver.
    Doeg stökskes eerappele en appel in `ne koomp same mèt de gesnipperde un, `t zaajt en de peper (nao smaak) en ming*.

    Doeg reurentere zoeväöl mèlk debij tot `t mingsel smeujig begint te weure.
    Bedèk `ne sjotel mèt slaojblaajer en ranzjeer d'n eerappeleslaoj dao-op in de vorm vaan e broed.

    Veur de versering**:
    Snij de komkömmerkes in de lengde drei kier bijnao gans door zoetot ze kinne `oetwejjere'.
    Snij de eier in de lengde door.
    Snij de tematte in sjijve.
    Kook de asperges gaar, laot ze aofkeule en drej `rs twie in eder lepke sjink.
    Ranzjeer de garnituur roond d'n eerappeleslaoj.
    Lègk ouch e paar temattesjijve bovenop***.
    Doeg op tematte en ei nao beleve e pröpke mayenais.
    Seer aof mèt de toefkes pitterseelje.


    * E paar eetlepele roej krote water gemink door d'n eerappeleslaoj gief dao e raos kleurke aon.
    Ouch kint e peursieke zalm dedoor weure gedoon.
    ** Ander garnituur?
    Droeve, ingemaakde keerse, stökskes annanas of peer, druugweurs, sardiensjes...
    * * * Ranzjeer de zèlver-unnekes riggelmaotig tösse de ander garnituur.
    Lègk `rs ouch e paar bovenop d'n eerappeleslaoj.
    Last edited by Breur; 20 september 2014, 12:35.
    Historie is niet alleen het weergeven van de as, maar ook het doorgeven van het vuur.
    Thomas More

  • #2
    Hieringeslaoj

    Hieringeslaoj.

    Get biezunders veur 's-middags bij e bruudsje en 'n lekker tas koffie.
    Veur 'ne gewoenen daag get fiestelik te make.
    Teminste, zoe deeg tant Merie dat.

    Hieringeslaoj.

    Recep veur 4 maan:
    4 zoer hieringe
    4 eerappele
    2 roej kreutsjes
    1 appel
    1 un
    2 eetlepele slaojolie
    1 eetlepel azien
    1 theelepelke sókker
    fien gesnipperde rammenas
    4 komkömmerkes in 't zoer-zeut
    get zaajt
    get peper
    reste vaan gekookde greuntes*...

    Snij de gefileerde hieringe in klein smal reepkes.
    Kook de eerappele mèt sjèl en al gaar en pèl ze.
    Kook de krote gaar en pèl ze.
    Sjèl d'n appel.
    Snij eerappele, krote, appel, rammenas en komkömmerkes in klein stökskes.
    Maak e sejske vaan olie, azien, gesnipperde un, sókker, zaajt en peper en ming dat los door de slaoj.

    * Zjus wie bij de kaw sjotel lete de tantes hun fantasie de vrije loup.
    Gekookde greuntes: zoe wie fien wörtelkes, ertsjes, stökskes blomkuul...
    Last edited by Breur; 20 september 2014, 12:36.
    Historie is niet alleen het weergeven van de as, maar ook het doorgeven van het vuur.
    Thomas More

    Opmerking


    • #3
      Kan Rubke ook een vertaalknop maken.
      Don't PRESS me....

      Opmerking


      • #4
        Oorspronkelijk geplaatst door elvis Bekijk bericht
        Kan Rubke ook een vertaalknop maken.
        Olijfje die heeft een prachtig en helder geformuleerd Mestreechs leesplenkske gemaakt
        Historie is niet alleen het weergeven van de as, maar ook het doorgeven van het vuur.
        Thomas More

        Opmerking


        • #5
          Es Paose en Pinkstere op eine daag valle
          Historie is niet alleen het weergeven van de as, maar ook het doorgeven van het vuur.
          Thomas More

          Opmerking


          • #6
            Oorspronkelijk geplaatst door parel
            Dat is mér allein in Amstenrooi
            Wat zien veer mestreechteneren toch aanders
            bei os steit de kaw sjotel altied klaor veur gaste he
            Fallor ergo sum

            Opmerking


            • #7
              Knien in `t zoer

              Knien in `t zoer #1.

              Tant Jès stoond bekind veur häöre knien-in-'t-zoer.
              Zjus wie tant Trui de hinne koch, oppe merret bij `n boerin, zoe kaom tant Jès aon häör knijns.
              Ouch oppe merret.
              Ouch bij `n boerin.
              Meh ein oet Wolder.
              Meh zij koch e levetig bies.
              Thoes mochte häör kinder dao eigelik neet mèt speule.
              Meh haw ze mer ins devaanaof!
              Zeker es dat e paar daog doorde ietot noonk Zjèf `m slachde, achter `t hoes op 't steiweegske.
              Daan hadde de kinder z'ch oondertösse zoe aon `t bies gehech tot zij mèt z'n alle in de kamer achter de touw gordijne stoonte te jenke.
              Noonk Zjèf pakde de knien mèt ein hand vas bij z'n achterpu, heel `m in de loch en streek `m mèt z'n ander hand stevig vaan bove nao
              oonder euver z'ne rögkk.
              Daan, mèt `ne korte slaag mèt de sjerpe kant van die hand, hojde heer `t bies in de nek.
              Doed!
              In eine slaag!
              Daonao pakde heer e sjerp eerappelemetske en snooj `t de keel door.
              `t Blood vóng `r op in `ne koomp.
              Vervolges snooj `r roond de achterpu `t vel door, hóng `t bies op aon `ne stevigen haok in de moer vaan de bijkeuke en begós `m "de jas oet te trèkke", zoe wie heer dat neumde.
              Vaan bove nao oondere, tot aon de kop, aon ei stök.
              Dao snooj heer `t aof.
              Dat vel drejde heer `t binnensteboete en völde de holte op mèt stru.
              Zoe hóng heer de `jas' aon `ne nagel oonder `t aofdaak.
              Oongesieferte zörgde daan deveur tot de reste vaan vleis en blood op waore tege d'n tied tot `t vel weier bewèrk mós weure.

              Daonao pakde heer de knien vaan d'n haok, strèkde `m oet op `n plaank en snooj `m de boek ope.
              De ingewande ginge d'roet op de lever en de neerkes nao.
              Vervolges kapde heer de oetinde vaan de voäör- en achterpu aof, die stökke boe nog vach umzaot, en daan woord `t bies gestökkerdd.
              Kop aof, väörpu devaan, batse... en de rögkstraank doorgekap.
              Daan waor `t de beurt aon tant Jès veur de knien weier klaor te make.

              `t Vel ging in e bad vaan aloen en woord daonao obbenuits te druge gehaange oonder `t aofdaak.
              Of `t woord ettelike daog achterein aon de binnekant naat gemaak en stevig ingevreve mèt aloenstein.

              En daan?
              Soms knipde noonk Zjèf `t ope veur te gebruke es slaopkamermetsje.
              Hadde ze gein vach nudig, ouch neet in de femilie, daan wachde ze op Medaar.
              Dee kaom ins per week langs.
              De mós wel good op `m lètte anders waor `r al weer de straot oet.
              'Knijnsvel! Haozevel!'
              Heer zag `t miejer estot 'r 't reep.
              Want Medaar waor lui.
              In 't begin droog 'r de broune jutezak boe heer de velle in verzamelde, euver 'n sjouwer op z'ne rögk.
              Meh al gaw kaom `r langs mèt `ne fiets aon z'n hand.
              Op de ierste plaots hoofde heer noe neet vaanoet de Plaankstraot te loupe nao de wiek boe heer ging ophole meh twiedens, en dat waor belangrieker, kós heer de zak aon `t stuur haange.
              Al nao gelang de cent die heer deveur vóng betaolde heer e döbbelsje oet.
              Of vief cent.
              Meh miestentieds niks.
              'Knijnsvel! Haozevel!'
              In d'n oorlog waor dao veur häöm niks aon te verdene.
              De lui hadde 't zelf hel nudig.
              Ze knipde 't mèt de sjier in stökke en nejde die oonderlangs de mouwe vaan `ne winterjas.
              Of op de kraag, in de nek.
              Of ze maakde `n móf devaan.
              Of slóffe.
              Historie is niet alleen het weergeven van de as, maar ook het doorgeven van het vuur.
              Thomas More

              Opmerking


              • #8
                Knien in `t zoer

                Knien in `t zoer #2

                Recep:

                4½ tas azien
                1½ tas water
                1 groete un in ringe gesnooje
                4 groffelsnegel
                1 lawweleerblaad
                1 eetlepel sjroep
                1 flinke sjijf peperkook
                1 theelepelke sókker
                10 peperbölkes
                2 steke magrien
                get zaajt
                get peper


                Vrief de stökke vleis good in mèt peper en zaajt, lègk ze in `ne rónne koomp en verdeil de unneringe detösse.
                Lègk de groffelsnegel d'rop, `t lawweleerblaad en de peperbölkes.
                Ming `t water en d'n azien, los de sókker dao-in op en sjöd zoevdäöl vaan `t mingsel in de koomp tot `t vleis oonder steit.
                Dèk de koomp aof mèt `nen teleur en zèt `m minstens 24 oor weg op e keul pläötske.
                Hool de knien oet de marinade en druug `m good aof.
                Laot de boter in `ne ketel broen weure en brooj `t vleis aon alle kante aon.
                Pak de stökke vleis d'roet en smoor de oetgeleekde unneringe goudgeel.
                Doeg de marinade debij, de lepel sjroep en de fien gemaakde snij peperkook.
                Bring de marinade reurentere aon de kook, doeg de knien debij en eventueel zoeväöl water tot `t vleis zjus oonder steit.
                Staof `t vleis gaar in anderhalf tot twie oor.
                Es de sajs neet genóg geboonde is get maïzena of meel debij doen.

                "t Vleis moot gemekelik loslaote vaan de kneuk', voond Tant Jès.
                'Wie gaarder wie lekkerder!'
                Historie is niet alleen het weergeven van de as, maar ook het doorgeven van het vuur.
                Thomas More

                Opmerking


                • #9
                  Zoervleis

                  Zoervleis.

                  Nej verwant aon 't gerech knien-in-'t-zoer is 't gerech zoervleis.
                  Veule- of peerdsvleis lient ziech dao good veur, volges tant Jès.

                  'Zoervleis is lekker bij wortelerats', vint Noonk Zjèf.
                  Noonk Zjèf wèrkde bij de pos op d'n trein.
                  In de poswagel.
                  Es sorteerder.
                  Zoe kaom heer nog ins örges!
                  Heer raakde good bevrund met de stationssjèf in Valkenberg, Hens Thiewisse.
                  Veur dee brach 'r 'n poorsie zoervleis mèt es Annie, Hens z'n vrouw, friet maakde.
                  Dat koppel waor wèld op friet mèt zoervleis.
                  Mèt ertsjes debij.
                  Of 'ne krop slaoj veerdig gemaak.
                  In deen tied kóste ze aon die kante dat zoervleis neet.

                  ¸¸.·´¯`·.¸¸.·´¯`·.¸¸.·´¯`·.¸¸.·´¯`·.¸¸.·´¯`·.¸¸

                  Recep:
                  1 kilo vleis
                  kilo unne, groof gesnooje
                  3 tasse azien
                  3 tasse water
                  4 groffelsnegel
                  1 lawweleerblaad
                  eetlepel sjroep
                  2 sjijve peperkook
                  1 theelepelke, sókker
                  10 peperbölkes
                  2 steke magrien
                  get zaajt en get peper

                  Vrief 't vleis in mèt zaajt en peper en snij 't in stökker vaan oongeveer 3 bij 3 centimeter.
                  Marineer 't minstes 24 oor in d'n azien gemink mèt 't water, 't zaajt, de peperbölkes, 't lawweleerblaad en de groffelsnegel.
                  Smoor in 'ne braodketel de unne in boter goudgeel en lègk ze eve opzij.
                  Hool 't vleis oet de marinade, druug 't en bak 't in die zelfde boter broen.
                  Doeg de unne bij 't vleis en zoeväöl marinade tot 't vleis zjus oonder steit.
                  Reur de sjroep dedoor, de fien gemaakde peperkook, de sókker en laot 't vleis op e lieg vuirke pruttele tot 't gaar is, d.w.z. tot 't
                  bekans oeterein vèlt.
                  Op smaak aofmake mèt peper en zaajt.
                  Historie is niet alleen het weergeven van de as, maar ook het doorgeven van het vuur.
                  Thomas More

                  Opmerking


                  • #10
                    Ries sjotel

                    Ries sjotel #1.

                    Veur 't make vaan 'n riessjotel mós Tant Trui iers sop trèkke vaan 'n hin.
                    Die haolde ze 's vriedags op de vrijemerret bij ein vaan de boerinne die z'ch oetgewinkeld hadde langs de stóp tösse de Ment en de Spèlstraot.
                    Eder boerin op häör vas pläötske.

                    De riessjotel maakde tant Trui volges e recep wat Noonk Sjo häör aofsjikde vaanoet Indië boe heer, nao z'nen deenstied es Oosgenger, ging wèrke op 'n theeplantaasj.
                    Ries mèt zoer sajs.
                    't Recep heet z'ch roondgesproke oonder femilie en kinnese en naobers esofste goud demèt kós make.
                    Tant Trui ging altied bij dezelfde boerin oppe merret.
                    Ein mèt echte sop-hinne.
                    Dikke vètte.
                    Die boerin zaot mèt häör körf op d'n hook vaan de Nuistraot.
                    Ze verkoch ouch eier en gooj boter en greunte getrokke in häör eige häöfke neve 'tt woenhoes vaan de boerderij.
                    Miestal koch tant Trui `n hin die al gekeeld waor.
                    Want e levetig bies d'n hals aofsnije... dat waor get veur noonk Pièrre en dee waor door d'n daag op ze werk.
                    Thoes gekoume boond tant Trui z'ch häöre kattenate sjolk veur, zat z'ch op de steiweeg op 'nen houte keukestool en sopde de hin in 'nen ummer flink heit water.
                    Daonao klemde ze 't bies stevig tösse häör kneeje en trok 't ein veur ein de vere oet.
                    Daan pakde ze e flink stök gezèt, drejde die inein tot e soortemint weurs, staok ze aon eine kant aon en vreef mèt 't brannend pepier euver 't bloet hinnevel.
                    't Stoonk zjus of ze e peerd aon `t besloon waore meh de stóppels in 't vel, boe de penne in hadde gezete, en de fien häörkes waore op 't eind vaan de behandeling eweg.
                    In de keuke lag ze de hin op de broedplaank, sliepde 't eerappelemetske en snooj 't bies de boek ope.
                    Mèt ein hand pakde ze d'n hals stevig vas, mèt de ander hand trok ze in eine grej de ingewande d'roet.
                    De maog, 't hertsje en de neerkes lag ze opzij.
                    Ze snooj de kop aof en braok de pu door.
                    D'n aofval drejde ze stevig in 'n gezèt en duide die in d'n drekbak.
                    Deep oonderin, zoetot de katte neet demèt kóste goon sleipe.
                    Ouch de vere ginge in d'n drekbak.

                    DE HIN DIE IS GEPLÖK
                    DE VERE ZIEN GEVLOGE
                    VAAN HEI TOT AON DE BRÖGK
                    ZE ZÈGKE 'T IS GELOGE
                    HOERA, VIVA,
                    VEER GOON NAO CHARLEROI.
                    Historie is niet alleen het weergeven van de as, maar ook het doorgeven van het vuur.
                    Thomas More

                    Opmerking


                    • #11
                      Ries sjotel

                      Ries-sjotel #2.

                      Recep veur hinnesop veur 6 maan:
                      1 sop-hin
                      2 liter water
                      1 groete un mèt 'ne groffelsnagel d'rin gestoke
                      4 tekskes pitterseelje
                      get zaajt
                      e stökske wortel

                      Zèt de hin mèt de un, de wortele, de pitterseelje en 't zaajt op in 't kaajd water.
                      Zèt de sop op e lieg pitsje naotot ze aon de kook is gekoume.
                      Laot ze 2 tot 2 1/2 oor trèkke.
                      Hool mèt 'ne potlepel de vètouge* die teväöl zien vaan de sop en zeef ze door 'ne naten dook oetgevawwe in 'n zeibaor.

                      * Iers de vètouge devaan hole en daan pas zeve.
                      Want es de sop te vèttig is geit d'n dook touwzitte.

                      Recep veur 6 maan:
                      1 sop-hin
                      2 liter hinnesop, gezeef
                      3 tasse ries
                      4 flinke eetlepele meel
                      'ne steek magrien
                      1-2 theelepelkes cetroensap
                      3 eier
                      get zaajt en peper

                      Hool 't vleis vaan de kneuk en snij 't in stökskes.
                      Verdeil de hèlf daovaan euver de boojem vaan 'ne vuurvaste sjotel.
                      Kook de ries in ± 1/2 liter bouillóng in oongeveer 10 menute gaar en behandel dee volges de aonwijzinge op de tuut of 't pak tot 'r druug is.
                      Verdeil de hèlf vaan de gekookde ries euver 't läögske vleis in de vuurvaste sjotel.
                      Bring 'n twiede laog vleis aon in de sjotel en daonao 'n twiede laog ries.

                      N.B. De sop die euver is gef g'r veuraof.

                      't Pepke:
                      Smèlt de boter in e ketelke en reur (heit!) 't meel dedoor.
                      Doeg reurentere sjeutsje nao sjeutsje heite sop debij.
                      Laot 't pepke ederskier obbenuits aon de kook koume.
                      In totaal is zoeget 'nen have liter sop nudig.

                      De zoer sajs:
                      Breek de eier en vaang de doojers op in 'ne koomp.
                      Klop ze mèt 'n versjèt tot de sjoem d'rop steit.
                      Doeg lepel nao lepel (zoeget 5 stöks) vaan 't pepke debij.
                      Blieve reure!
                      Daonao 't mingsel langsaam door 't pepke in 't ketelke minge.
                      Neet mie koke!
                      Maak de sajs aof op smaak mèt 't zaajt, de peper en de cetroen.
                      Vaan die sajs sjöt g'r zoeväöl euver de laoge hin en ries in de sjotel es geit.
                      Wat euver is serveert g'r in 'ne sajskoomp.
                      Historie is niet alleen het weergeven van de as, maar ook het doorgeven van het vuur.
                      Thomas More

                      Opmerking


                      • #12
                        Boojem vaan gesdeig

                        Boojem vaan gesdeig

                        Wee vlaoj zeet dink aon Limburg.
                        Noe zien ze in gans Nederland en alle daog te koup.
                        Vreuger waore ze 'n traktatie bij biezunder gelegenhede.
                        Niemes bakde zoen lekker vlaoje es tant Jès.
                        Oet häör erfenis stek hei neve 't recep vaan de gesdeig wat zie gebruukde veur häör boojems.
                        Mèt kèrmes laoge bij häör in de keuke zoen twintig, daartig vlaoje oetgewinkeld op lang plenk, nevenein.
                        Kaarraajer!
                        Dun vaan leer en dik vaan smeer!
                        Rieste, keerse, ringelaote, appelekouwe, reberber, appeleslóf, kroonsele mèt-ruutsjes...
                        De femilie mós ze iers käöre mèt de ouge, daan moch 't pas mèt de tóng.
                        E sjeutelke gaof 't neet debij.
                        Te väöl aofwas.
                        En trouwes, vlaoj ete deiste oet de hand!
                        In 'n hajding zoewieste 'n sappige pees its: de kop nao väöre, de póffert nao achtere.
                        "Veur neet op de kezjeveksje te gössjele", zag tant Jès.
                        "De paks mèt doum en wiesvinger, de stök vas aon de koors.
                        D'n ander vinger hèlste d'roonder es steun.
                        De punt sjuifste 't ierste in d'ne moond.
                        Hap..."
                        Bij de erfenis vaan tant Jès zaote versjeie recepte veur de völling.



                        Boojem vaan gesdeig

                        Recep veur 'ne boojem vaan zoe'n 25 cm. doorsnei
                        2 1/2 tas meel
                        2 steke magrien
                        5 glad aofgestreke eetlepele sókker
                        7 eetlepele mèlk (oongeveer)
                        1 1/2 loed ges
                        e metspuntsje zaajt
                        eventueel e ei

                        Maak de mèlk law (neet heit) in e penneke.
                        Reur de ges mèt 1 eetlepel vaan die mèlk tot e pepke.
                        Los de boter op in 5 eetlepele mèlk.
                        Doeg `t meel in 'ne koomp en strui 't zaajt langs de boeterand.
                        Maak in 't midde vaan 't meel 'n kojl en doeg dao in: de sókker, 't ges pepke en de in mèlk opgelosde boter.
                        Begin doorein te reure vaanaof de rand vaan de kojl nao boete touw.
                        Knej vervolges de massa tot ze soepel is.
                        Dèk de koomp aof mèt 'ne vochtige potdook, zèt 'm op e werm pläötske en laot 't deig drei keteer tot 'n oor rijze.
                        Knej 't deig nog eve good door op de taofel boe-op meel is gestruid.
                        Rol 't deig mèt de deigrol oet tot de zjuste gruutde.
                        Smeer de vlaojplaat in mèt magrien, kwispel meel d'reuver en lègk de lap deig drop.
                        Steek mèt 'n versjèt op regelmaotige aofstande leukskes in de boojem en laot 't deig nog e haaf eurke rijze oonder dee potdook op dat werm pläötske.
                        Last edited by Breur; 20 september 2014, 12:36.
                        Historie is niet alleen het weergeven van de as, maar ook het doorgeven van het vuur.
                        Thomas More

                        Opmerking


                        • #13
                          Riestevlaoj

                          Riestevlaoj

                          Ietot de riestevlaoj woord aongesnooje mochste tant mèthelpe koffie te zètte.
                          De klemdes d'ch 't meuleke tösse de kneeje, kopere sjuif ope, boene in d'n hawwer en mer drejje... tot de spierbelke gleujde, d'n vinger verkrampde en d'ch de traone in d'n ouge sjote umtotste d'ch de vel vaan d'n bein pitste tösse 't meuleke en de zitting vaan d'n houte keukestool.

                          't Waor ech jenke es d'ch 't läöjke mèt gemaole koffie en al oet 't meuleke sjievelde en euver de groond keigelde.

                          Tant deeg de koffie in de pot: e paar flinke eetlepele.
                          Zij wis de maot!
                          Kokend water drop oet d'n aosemende waterketel op de glanzende kwiezenière of op t greun potkechelke.
                          Opsjödde aon de kant vaan d'n tuitel.
                          Daan kaom dao wienig of geinen dras in.
                          Mós toch nog weure op-en-aof gesjöd, daan ging dat kloppentere mèt 'n tas tege d'n oonderkant vaan d'n tuitel, veur de verstopping d'roet te hole.
                          Veurziechtig, tot neet inins 'n flinke götsj koffie mèt dras euver 't taofellake góng.
                          Trökdoen in de pot, get Buismans debij of e theelepelke zaajt...

                          Riestevlaoj

                          Recep:
                          tas pap-ries
                          6 tasse mèlk
                          1 tas sókker
                          3 eier
                          2 theelepelkes feniele-sókker
                          en eventueel
                          1 loed custardpoejer

                          Maak 'ne boojem vaan ges-deig.
                          Bring de mèlk aon de kook en reur de ries en 'n haaf tas sókker dedoor.
                          Blief reure tot de mèlk obbenuits kook.
                          Doeg d'n dèksel op de ketel en zèt 'm op e lieg vuirke.
                          Controleer nao zoeget 'n oor of de ries gaar is.
                          Reur daonao de fenielesókker dedoor.
                          Splits de eier in dooiers en in wit.
                          Doeg de res vaan de sókker bij de doojers en klop ze mèt 'n versjèt tot sjoem.
                          Reur de sjoem door de riestepap.
                          Klop 't eiwit in `nen depe teleur mèt 'n versjèt stief lepel dit veurziechtig door de pap.
                          Verdeil de pap geliekmaotig euver de boojem en zèt de vlaoj zoen 25 tot 30 menute in d'n ove (220°C).

                          Bekkers foetele wel mèt die geel kleur van de riestepap door saffraon debij te doen.
                          Last edited by Breur; 20 september 2014, 12:37.
                          Historie is niet alleen het weergeven van de as, maar ook het doorgeven van het vuur.
                          Thomas More

                          Opmerking


                          • #14
                            Reubesop #2

                            Reubesop (dikke).

                            "Reubesop", zag Tant Trui, "móste make véúr de Keersmes.
                            Want es 't Kinneke is gebore höbbe de reube hunne smaak verlore".
                            Allewijl, mèt die keulcelle, geit die volkswiesheid neet langer op.
                            Zij es Grameer lierde häör kinder en kleinkinder e veerske euver reube.
                            Mèt e kleineke op häöre sjoet lag ze ein van häör vuus op taofel mèt d'n dom rechop in de loch.
                            't Kinneke knelde deen doum in zie vuuske en staok daobij zie duimke in de loch.
                            Grameer klemde op häör beurt dat duimke in häör ander voes en 't kleint lag es lèste zie twiede vuuske daobovenop.
                            Daan trok grameer häör ierste voes oonder d'n torie oet en pakde 't beuvenste duimke van 't keend vas.
                            Zoe deeg ouch 't keend en oondertösse tot vuus een vuuskes vaan oonder nao bove wisselde dreunde ze same hel-op:

                            ÖPKE, DÖPKE, REUBESÖPKE,
                            VAAJER HEET E KRABBEKÖPKE,
                            MOOJER HEET E NIETEKÖPKE,
                            ÖPKE, DÖPKE, KNO..O..O..OL!!!!

                            Bij 'knol!' spatde d'n torie oeterein en vloge han en hennekes de loch in.

                            "Wat veur sjaopevleis gebruuk geer, tan Trui?"
                            "Dat kint hamelsvleis zien of vaan 'ne bok of e sjaop.
                            Of lamsvleis..... 't kint allemaol.
                            Elk heet veur ziech 'ne get ander smaak.
                            Meh 't gief allemaol lekker reubesop."
                            "Hamelsvleis?
                            Dat �*s toch vleis vaan 'ne bok!"
                            "Jao, vaan 'ne gecastreerde."
                            "Mage 't ouch ribkes zien?"
                            "Ribkes of e sjouwerstök.... 't maak niks oet.
                            De haols gewoen 't vleis vaan de kneuk aof naotot 't gaar is."


                            Dikke reubesop.
                            Recep veeur 4 maan.

                            * 2 kilo reube
                            * 1 kilo eerappele
                            * 3/4 kilo sjaopevleis
                            * 2 liter water
                            * get zaajt
                            * väöl peper

                            Kook 't sjaopevleis gaar in ein tot anderhaaf oor.
                            Sjèl de reube en de eerappele en snij ze in stökker.
                            Hool 't vleis oet de bouillóng, doeg de reube en de eerappele d'rin en kook die in zoe'n drei keteer gaar.
                            Bring de reube en de eerappele euver in 'n zijbaor die op 'nen andere ketel steit en vrief ze dao-in fien mèt 'nen houte stamper.
                            Speul de zijbaor door mèt de bouillóng.
                            Snij 't sjaopevleis in stökskes en doeg 't in de sop.
                            Aofmake nao smaak mèt get zaajt en väöl peper.
                            Historie is niet alleen het weergeven van de as, maar ook het doorgeven van het vuur.
                            Thomas More

                            Opmerking


                            • #15
                              In het kookboek van Jo Caris (Ierste Mestreechter Kookbook) staan de volgende 'soppe':
                              Vleissop - Ossestartsop - Poorsop - Hinnesop - Reubesop - Greun sop.

                              En Wortelevlaoj veur de Worteleboere vaan Wyck .
                              Historie is niet alleen het weergeven van de as, maar ook het doorgeven van het vuur.
                              Thomas More

                              Opmerking

                              Bezig...
                              X